Sosial

Bahalı layihədən söylənənlər: “Şikayət edib söyüş yiyəsi olaq? Etsək guya nolacaq ki?..”

Roza Məmmədova
31 Mart, 2022
2833

Sosial Media

2018-ci ildə açılışı olan “Qobu Park” yaşayış kompleksinin problemləri layihənin yaşından artıqdır. Hər halda burda yaşayan sakinlərin dediklərindən belə başa düşmək olur.

Məcburi köçkünlər üçün salınmış yaşayış kompleksinin təməli 2017-ci ildə Birinci vitse-prezident Mehriban Əliyevanın iştirakı ilə qoyulub. Sifarişçisi “Paşa Holding”, podratçısı “Kristal Abşeron” MTK olan bu layihə 2020-ci ildə “Qobu Park 3”-ün istismara verilməsi ilə yekunlaşıb.

Məcburi köçkünlərin yaşaması üçün nəzərdə tutulan yaşayış kompleksində bütün zəruri infrastrukturun qurulduğu qeyd olunur: mərasim evindən tutmuş poçt, tibb, polis məntəqələri, istirahət parkı, uşaq meydançaları və s. yaradılıb.

Prezident İlham Əliyev “Qobu Park-2” yaşayış kompleksinin açılışında- açıq mənbələrdən götürülüb

Rəsmi məlumatda tikinti işlərinin yüksək səviyyədə həyata keçirildiyi, elektrik, su, qaz, istilik təchizatı və suvarma sisteminin, rabitə və televiziya şəbəkəsinin qurulmasına xüsusi diqqət yetirildiyi vurğulanır.

Amma

“Qobu Park 2”-də yaşayan Rövşən Əsədov buraya köçdüyü gündən su problemi yaşadığını söyləyir. Onun sözlərinə görə, ərazidə hər 6-7 binaya tutumu təxminən 150 ton olan su çəni qoyulub. Su borularla həmin çənə toplanır, buradan isə yaşayış binalarına ötürülür.

“Su istənilən vaxt, günün müxtəlif saatlarında kəsilir. Su kəsilən saatları toplasaq demək olar ki, həftədə 2-3 gün susuz qalırıq. Kəsilməmişdən qabaq isə heç bir xəbərdarlıq olunmur. Təsadüfi hallarda biz bilirik ki, filan gün susuz qalacağıq. Bu, bizim üçün artıq adi haldır”.

Binanın 10-cu mərtəbəsində yaşayan Rövşən Əsədov deyir ki, təzyiq zəif olduğundan bəzən su gəlsə belə yuxarı mərtəbələrə çıxmır.

"İçməli su hovuzunun tutumu təxminən 150 tondur. Lakin hovuza daxil olan boru ilə təchizat borusu fərqli ölçülərdə olduğu üçün hovuzda su tez bitir, bu halda nasoslar boş işləyib yanmasın deyə dayandırılır. Yetərli su hovuza yığıldıqdan sonra yenidən işə salınır".

Onun sözlərinə görə, təmir işləri əsaslı aparılmadığından su borusu tez-tez partlayır.

Toplum TV 

“Qobu Park 2”-nin ərazisində olarkən deyilənləri gözlərimizlə görürük. Binanın həyətində boruların keçdiyi yerlər yenicə qazılıb. Onların keçdiyi müxtəlif yerlərdə gölməçələrin yaranması, torpağın palçıqlı olması boruların müxtəlif istiqamətlərdə partladığını göstərir.

"Qobu Park 2"- Toplum TV

Ərazidə yaşayan sakinlərin sözlərinə görə, borular dəyişdirilmək əvəzinə “yamaq vurulduğundan” tez-tez qəza baş verir.

“Qəza xidmətinə zəng  edəndə onlar ya gec reaksiya verirlər, ya da problemli yeri tapmaqda çətinlik çəkirlər. Normalda qəzanın hansı istiqamətdə olduğunu müəyyənləşdirmək üçün aparat olmalıdır, amma onlar təxmini yerləri qazırlar. Buraları qazmaqdan qəbirstanlığa döndəriblər”,- sakinlərdən biri belə deyir.

Toplum TV

Söhbətləşdiyimiz sakinlərdən durumla barışıb şikayət etməyənlər də var: “Şikayət edib söyüş yiyəsi olaq? Şikayət etsək guya nolacaq ki?..”

Xarab kameralar, deşik "kafellər", nəmişlik...

Sakinlər burada vaxtaşırı oğurluq hallarının baş verməsini də deyirlər. Ərazi boyunca binalara quraşdırılan kameraların sınıq və naqillərinin kəsik olması onların işlək olmadığını göstərir.

Binaların fasadına vurulan üzlük divara şuruplarla bərkidilib. Bəzilərinin şuruplarının boşalıb, düşdüyü görünür. Həmsöhbətimiz Rövşən Əsədov deyir ki, kafellər yapışdırılmaq əvəzinə deşilərək bərkidildiyi üçün yağış və külək olanda binalara su damır, nəticədə divarlar nəmişlikdən göyərir.

Toplum TV

Daha əvvəl də sosial mediada, mətbuatda “Qobu Park”-dakı binaların keyfiyyət məsələsi gündəmə gəlmişdi.

Yazılarda binaların əyildiyi, sonuncu mərtəbələrdə tavandan su damdığı qeyd olunurdu.

“Azərsu”nun mövqeyi nikbindir

Qurumun 2020-ci ilə aid məlumatına görə, “Azərsu” ASC “Qobu Park” yaşayış kompleksini dayanıqlı içməli su ilə təmin etmək üçün yeni alternativ magistral kəmər inşa edilib, zəruri infrastruktur yaradılıb. Gələcəkdə  xətlərin hər hansı birində planlı fasilə və ya qəza baş verdikdə sakinlərin normal rejimdə içməli su ilə təmin olunacaqları vurğulanır.

Qurumun Mətbuat xidməti və ictimaiyyətlə əlaqələr şöbəsinin rəhbəri Anar Cəbrayıllı “Toplum TV”-yə açıqlamasında boruları “Azərsu”nun quraşdırmadığını, onların keyfiyyətinə cavabdeh olmadıqlarını söyləyir.

Anar Cəbrayıllı- Son Xəbər.az

O həmçinin, su xəttində qəza baş verdikdə aradan qaldırıldığını, amma bunun tez-tez baş vermədiyini qeyd edir.

“O ki qaldı boruların yamanmasına, bunu deyən sakinlərin özlərindən soruşarsınız”,- deyə mətbuat katibi açıqlamasını bununla yekunlaşdırır.

“İstismarçı dövlət qurumudursa irad onlara bildirilməlidir”

Araşdırmaçı jurnalist Hafiz Babalı deyir ki, podratçı şirkətlərin əsas işi layihəni icra edib təhvil verməkdir.

Hafiz Babalı - Abzas Media

“Qanunvericiliyə görə, podratçı təşkilat təhvil-təslimat etdikdən sonra bütün əməliyyatlara cavabdeh  sifarişçi olur. Yəni layihə təhvil verilməmişdən qabaq nöqsanlar aşkar olunubsa “Kristal Abşeron”-a deyilə bilərdi. “Qobu Park” yaşayış kompleksinin istismarçısı Qaçqın və Məcburi Köçkünlərin işi üzrə Dövlət Komitəsidir. Komitə istismar, abadlaşdırma, təmir, təchizat və s. işləri üçün tender, kotirovka sorğusu keçirir. Dövlət büdcəsindən bu məsələlərlə bağlı vəsait ayrılır. İstismarçı dövlət qurumudursa, irad onlara bildirilməlidir. Belə layihələrdə tərəflər kollektiv məsuliyyət daşıyırlar”.

Deyilənlərlə bağlı “Kristal Abşeron” MTK-ya müraciət etsək də, onlardan cavab almaq mümkün olmadı.

Qaçqın və Məcburi Köçkünlərin İşləri üzrə Dövlət Komitəsindən sorğunun qəbul edildiyini, cavab veriləcəyini bildirdilər.

Sifarişçi və podratçı şirkətlər kimlərindir?

Azərbaycanın ən iri şirkəti olan, sığorta, bankçılıq, səyahət və turizm, tikinti-inşaat, texnologiya, ekosistem, investisiya, brokerlik və digər biznes sahələrində çalışan "Paşa Holdinq"in əsas pay sahibləri prezident İlham Əliyevin qızları Leyla və Arzu Əliyevalardır. Bu haqda jurnalist araşdırmalarında qeyd olunur.

İnhasırçı şirkət kimi tanınan bu holdinqə «Paşa Bank», «Paşa Sığorta», «Paşa Həyat Sığorta», «Paşa İnşaat», «PMD Group», «Paşa Beton», «Amal İnvestment Group», «Lenkeran Hotel and Resort Company», «Paşa Development», «Qlobeks» MMC-lər və digər şirkətlər daxildir.

Meydan TV

“Kristal Abşeron” MMC-nin təsisçisi kimi Tovuzdan olan iş adamı Məhayət Nəbiyev göstərilsə də, mətbuatda şirkətin qeyri-rəsmi sahibinin deputat Ağalar Vəliyev olduğu qeyd olunur. “Şərəf Orden”li deputatın da adı tez-tez biznes layihələrində hallanır. Məsələn, sədri olduğu  «Azəraqrartikinti» Səhmdar Cəmiyyəti (40 filialı məlumdur) adətən dövlət tenderlərinin qalibi olub.

Həm Paşa Holdinq, həm də “Kristal Abşeron” MTK haqqında yazılanlar və səsləndirilən iddialar “Qobu Park” kimi böyük bir layihənin nə qədər şəffaf həyata keçirilməsini sual altına qoyur.

“Azərbaycanda şəffaf satınalma sistemi işləmir”

“Qobu Park”-dakı çatışmazlıqları şərh edən iqtisadçı ekspert Rövşən Ağayev belə deyir.

Rövşən Ağayev- "Toplum TV"

Onun fikrincə, bu qədər böyük sərmayə və satınalmanı rəqabət olmadan  hakimiyyətə yaxın şirkət şəbəkəsi qazandığından tikintiyə məsuliyyətli yanaşma olmaya da bilər.

“Rəqabət mühiti olduqda şirkətlər işə məsuliyyətli yanaşır: onların sərancamında peşəkar kadrlar, zəruri resurslar olur. İşin keyfiyyətli görülməsi üçün mümkün qədər daha çox şirkət tenderlərdə iştirak etməli, proses şəffaf keçirilməlidir”,- iqtisadçı bildirir.


Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.

Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.

Ən doğru xəbərləri izləmək üçün Toplum TV-yə abunə olun.

Youtube: https://www.youtube.com/channel/UCztIohlYx63yMJzcRTF18IA

WebSite: https://toplum.tv

Facebook: https://www.facebook.com/toplumtv

İnstagram: https://www.instagram.com/toplumtv/

Telegram: https://t.me/Tvtoplum

Şikayətlərinizi Whatsapp-da Qaynar Xəttimizə göndərin: +99450 247 55 06

Sosial

Jurnalist həbs olundu, həmkarı məhkəməyə təşəkkür etdi

Samirə Əli
26 Yanvar 2023
Jurnalist Aydın Canıyev bir ay müddətinə inzibati həbs edilib. Toplum Tv xəbər verir ki, bu barədə elektron məhkəmə sistemində qeyd olunub.  Işə baxan hakim Murad Məmmədov olub. İnzibati xətalar məcəlləsinin 388-1.1.1 (İnformasiyadan istifadə edilməsi, onun yayılması və mühafizəsi qaydaları əleyhinə olan inzibati xətalar) maddəsi ilə ittiham olunub. Jurnalist Eynulla Fətullayev facebook hesabında iddia edib ki, Aydın Canıyev onun barəsində təhqir işlətdiyi üçün Baş Prokurorluğa müraciət edib: “Hörmətli baş prokurora və məhkəməyə təşəkkür edirəm”, Eynulla Fətullayevin Aydın Caniyevin həbsinə reaksiyası belə olub. Jurnalist Aydın Canın facebook səhifəsində Yasamal məhkəməsinin jurnalistə bir aylıq inzibati həbs verildiyi qeyd olunub. “ Eynulla Fətullayevin Baş...
Sosial

Dövlət Gömrük Komitəsinin 2 əməkdaşı rüşvətə görə saxlanılıb

26 Yanvar 2023
Baş prokuror yanında Korrupsiyaya qarşı Mübarizə Baş İdarəsi Dövlət Gömrük Komitəsinin Aksizli mallar İdarəsində keçirdiyi əməliyyat nəticəsində iki nəfər saxlanılıb, onlar barəsində məhkəmənin qərarı ilə həbs qətimkan tədbiri seçilib. Bu haqda Baş Prokurorluqdan Toplum TV-yə verilən məlumatda deyilir.  Saxlanılanlar Şahin İskəndərov və Cavid Məmmədovdur, onlara qarşı Cinayət Məcəlləsinin 311.2 (rüşvət alma) və 311.3.2-ci (təkrar rüşvət alma) maddələrilə ittiham elan edilib. Bildirilir ki, Baş Gömrük İdarəsinin Gömrük dəyərləndirilməsi və risklərin idarə olunması şöbəsinin əməkdaşı Şahin İskəndərovun ölkəyə gətirilmiş avtomobillərə görə ödəniləcək rüsum və digər xərclərin azaldılması müqabilində rüşvət almasına əsaslı şübhələr müəyyən edilib. Sözügedən qurumun Şirvanlı Gömrük Postunun əməkdaşı Cavid Məmmədovun...

Seçilmiş Videolar

Toplum TV loqo