Sosial

Bahardan əsər-əlamət olmayan Bahar qəsəbəsi - "İtlər də bir yandan camaata hücum edir”

Lida Abbaslı
4 May, 2022
182

Toplum Tv

Bahar fəslinin ortası olsa da, Bahar qəsəbəsində yazdan əsər-əlamət yoxdur. Hər yan bom-bozdur. Güclü külək qəsəbənin çala-çuxur yollarındakı tozu insanın nəfəsinə doldurur.

Sakinlər danışırlar ki, öz imkanları hesabına yollara əl gəzdirməyə çalışsalar da, bütün küçələri düzəltdirmək mümkün olmayıb, bəzi yerlərdə yol elə kələ-kötür qalıb.

Toplum Tv

“Qaranlıqda itlər də bir yandan camaata hücum edir”

Bahar sakinlərinin sözlərinə görə, daha bir problem küçələrin işıqlandırılmamasıdır. Qəsəbə sakini Nailə Hüseynova deyir ki, yollarda işıq yoxdur deyə axşam evə yıxıla-yıxıla gedib çıxırlar.

Nailə Hüseynova - Toplum Tv

“Qaranlıqda itlər də bir yandan camaata hücum edir. Qorxudan nə qədər adam xəstəlik tapıb. Hamilələr, uşaqlar, qocalar nə etsin o yollardan keçəndə?”

İlqar Hüseynov da sahibsiz itlərin əlindən təngə gəlmələrindən, onların dəfələrlə uşaqlara hücum etməsindən danışır.

İtlərin hücumuna məruz qalanlardan biri də Əsmər Bəylərovadır.

Əsmər Bəylərova -Toplum Tv

Anası Lətifə Ağakişiyevanın sözlərinə görə, hadisə 2 ay əvvəl, Əsmər marketdən çörək alıb qayıdanda baş verib, it onu bir neçə yerdən dişləyib. O, 40 günlük müalicədən sonra sağala bilib.

Lətifə Ağakişiyeva deyir ki, itlər təkcə qızına yox, qəsəbədə çoxuna xəsarət yetirib.

Toplum Tv

Yaxın zamanlarda 55 yaşlı kişinin də it ayağından dişlədiyi üçün axsayırmış.

Onun sözlərinə görə, sahibsiz itlər toyuq-cücəyə də hücum edir.

“Dəfələrlə olub ki, gecə gəlib toyuq-cücəni parçalayıb aparıblar. İtlər toyuğu az qala göydə tutub parçalayır. İnsana da, heyvana da eyni cür hücum çəkirlər”.

Toplujm Tv

Lətifə Ağakişiyeva son hadisədən sonra aidiyyatı qurumlara müraciət etdiklərini, ondan sonra hücumların bir qədər azaldığını söyləsə də, təhlükənin qaldığını bildirir. O, çox qorxduqlarını, it görəndə tək çarəni arxalarına baxmadan qaçmaqda gördüklərini deyir.

“Bu yerlərin yiyəsi yoxdur, ona görə bura it də gələr, qurd da”, -sakinlərdən biri deyir.

“Toplan” Sahibsiz itlərə qayğı mərkəzindən “Toplum TV”-yə bildirilir ki, əməkdaşlar qəsəbədə dəfələrlə reydlər keçirib və aşkar edilən sahibsiz küçə itləri tutulub.

Toplum Tv

“Mütəmadi olaraq da qəsəbə daxili küçələrə baxış keçirilir. Yenidən şikayətlər olduğu halda əməkdaşlar məsələ ilə maraqlanacaq”, - mərkəz əməkdaşı əlavə edir.

Kanalizasiya xətti yaxınlıqdan keçsə də…

Qəsəbənin problemlərindən biri də kanalizasiya sisteminin olmamasıdır.

Toplum Tv

Buna görə də qəsəbənin ta girişindən üfunət iyi hiss olunur. Yol boyu hər evin qarşısında üstü taxta ilə örtülmüş kiçik kanalizasiya quyularına rast gəlmək olur.

Qəsəbə sakini Mustafa Abbasov deyir ki, camaat kanalizasiya sularını quyu qazdırıb ora axıdır.

Toplum Tv

“Ayın axırında da 30-40 manat veririk ki, maşınlar gəlib onu çəkib aparsın… Bir neçə dəfə fərqli qurumlardan gəlib baxıb, camaatla söhbət ediblər. Bir-iki görünən yerdə işlər görüldü, amma əsas yerlər yenə qaldı”.

“Qəsəbənin yaxınlığından böyük kanalizasiya xətti keçir. Amma bizim o kanalizasiya xəttinə qoşulmağımıza icazə yoxdur”, - bunu da sakinlərdən biri söyləyir.

Toplum Tv

İlqar kişinin söylədiyinə görə, bir müddət əvvəl rəsmi qurumlar bu əraziyə kanalizasiya xəttinin çəkilməsinin planda olduğu haqda məlumat veriblər. Amma həmin vaxtdan sonra nə gələn, nə də gedən olub.

“Azərsu” Açıq Səhmdar Cəmiyyətindən “Toplum TV”-yə verilən məlumata görə, Abşeron yarımadasının kanalizasiya sistemlərinin baş planında infrastrukturun yaradılması nəzərdə tutulur. Amma ASC-dən layihənin nə vaxt icra olunacağı haqqında konkret məlumat verilmir.

açıq mənbədən götürülüb

Qəsəbədə poliklinika yoxdur, məktəb də…

Qəsəbədə poliklinikanın olmaması bir yana, başın ağrıyanda dərman almağa balaca bir aptek də yoxdur.

“Kimsə şəhərə çıxanda yalvarırıq ki, bizim üçün də filan şeyi alsın”, - sakinlərdən biri deyir.

Baharın illərdir həll olunmayan digər problemi yaxın ərazidə məktəbin olmamasıdır. Qəsəbə camaatı uşaqlarını ya Hövsan, ya da Suraxanıdakı məktəblərdən birinə aparırlar.

Toplum Tv

Övladlarını məktəbdən götürmək üçün dayanacaqda avtobus gözləyən valideynlərin sözlərinə görə, yol uzaq olduğundan uşaqları məktəbə özləri aparıb-gətirirlər.

“İllərdir pulumuz yollarda qalıb. Bu qədər geniş, boş ərazidə bir məktəb tikən yoxdur”.

Toplum Tv

Onlar qışda xərclərinin ikiqat olduğunu, Baharın palçıqlı yollarının uşaqların ayaqqablarını tez sıradan çıxardığını, bəzən də vaxtında məktəbə çatmaq üçün taksiylə getdiklərini söyləyirlər.

Sadalananlarla bağlı nə Suraxanı rayon İcra Hakimiyyətindən, nə də qəsəbənin bələdiyyəsi ilə danışmaq mümkün olur.

açıq mənbədən götürülüb

Baharda problemlərsə bitmək bilmir. Bəlkə buna görə də yol boyu hər on evdən birinin qapısına ya “satılır” elanı yazılıb, ya da böyük qıfıl vurulub. Sakinlərdən bunun səbəbini soruşanda deyirlər ki, Baharda yaşamaq hər oğulun işi deyil.

 

 

 

 

Sosial

Türkiyədə imtahan suallarını qanunsuz satan azərbaycanlılar saxlanılıb

17 May 2022

açıq mənbədən götürülüb

Ankarada Amerika və Türkiyə universitetlərində təhsil almaq istəyən əcnəbi tələbələrə SAT imtahan (Scholastic Aptitude Test - akademik qabiliyyət imtahanı) suallarını satdığı iddia edilən 6 şəxs saxlanılıb. "TRT Haber"in məlumatına görə, saxlanılanlar arasında azərbaycanlıların da olduğu deyilir. Ankara Respublika Baş Prokurorluğu mayın 7-də keçirilən SAT imtahan suallarının Ankarada 2-3 min dollara satılmasından sonra istintaqa başlayıb. İstintaqı dərinləşdirən prokurorluq, İran və Azərbaycan vətəndaşları da daxil olmaqla 6 şübhəlinin “Telegram” mesajlaşma proqramı vasitəsilə əlaqəyə girdiyini aşkarlayıb. Cahid və M.N. adlı şəxslərin sualları “karantin” adlandırdıqları evlərdə payladıqları müəyyən edilib. Baş Prokurorluğun göstərişi ilə Maliyyə Cinayətlərinə Qarşı Mübarizə İdarəsinin əməkdaşları təyin olunmuş ünvanlarda eyni vaxtda...
Sosial

Müştəri restoranda servis haqqı ödəməlidirmi?

Roza Məmmədova
17 May 2022

Getty Images

Restorana gedəndə xərcinizi menyudakı qiymətlərə görə hesablayırsınızsa, sürprizə hazır olun. Bəzi kafe və restoranlarda yeyib içdiyinizdən əlavə servis haqqı da tutulur. Nədir servis haqqı? Bura restoranda dinlədiyiniz musiqi, servis xidməti, istifadə olunan qab-qacaq və s. aiddir. Bakıda “Özsüt” restoranında ofisiant işləyən Pünhan Cəfərov (ad şərtidir) deyir ki, müştərilər əvvəlcədən servis haqqı tutulduğunu bilmir: “Onlar bunu ya menyu jurnalından, ya da hesab qəbzindən öyrənə bilirlər. Müştərilər çox zaman servis haqqını ən sonda, hesabı istəyəndə görür, təbii, narazılıq edənlər də olur”. Pünhanın sözlərinə görə, bu restoranda əlavə xidmət haqqı ümumi hesabın 6%-i qədərdir: “Servis haqqı ofsiantlar müştəriyə qulluq edir, restoranın boşqabları istifadə...

Seçilmiş Videolar

Toplum TV loqo