ABŞ prezidenti Co Bayden cümə axşamı Ağ Evdəki çıxışı zamanı ölkəsinin Rusiya ilə münasibətləri barədə yeni bəyanatlar səsləndirib. Həmin gün administrasiya Rusiyaya qarşı yeni sanksiyaları da elan edib. 

"Radio Svoboda"-nın məlumatına görə, ABŞ lideri çıxışı zamanı Putinlə bu həftə baş tutan telefon danışığını xatırladıb. 

"Prezident Putinlə söhbət zamanı aramızdakı şəxsi, birbaşa təmasın xüsusilə daha effektiv münasibətlər üçün çox vacib olduğuna əmin oldum. O da bununla razılaşdı. Bu mənada  ölkələrimizin qarşısında duran bir sıra məsələləri müzakirə etmək üçün bu yay Avropada sammit çərçivəsində şəxsən görüşməyi təklif etdim”.

Bayden deyib ki, hazırda komandalar bu fürsətin mümkünlüyünü müzakirə edirlər.

"Vaşinqtonun sanksiyalar barədə tezliklə qərar qəbul edəcək", - Birləşmiş Ştatlar prezidenti Putinlə söhbət zamanı ona bu məsələni də çatdırdığını deyib. 

Bayden Rusiyanın ABŞ seçkilərinə müdaxiləsini xüsusi vurğulayıb və qeyd edib ki, Birləşmiş Ştatlar heç kəsə demokratik təsisatları sarsıtmağa imkan verməyəcək və belə təxribatçı əməllərin davam edəcəyi təqdirdə yeni sanksiyaların tətbiqi mümkündür. O, həmçinin haker hücumları və Krımın anneksiyasını da xatırladıb. 

O, daha sonra bildirib ki, Putin Ukraynaya qarşı hər hansı aqressiv hərəkətlərdən çəkinməlidir: "Birləşmiş Ştatlar bundan sonra da öz maraqlarını və dəyərlərini, eləcə də müttəfiqlərini müdafiə edəcək. Sanksiyalar daha sərt ola bilərdi, amma daha mülayim variant seçilib".

ABŞ-ın Rusiyaya tətbiq etdiyi yeni sanksiyalar Rusiyanın dövlət borcu ilə bağlı bazardakı əməliyyatlara, bir sıra  fiziki və hüquqi şəxslərlə əməkdaşlığa qadağa qoyur, eləcə də aktivlərin dondurulmasını nəzərdə tutur. 

Co Baydenin dünən imzaladığı daha bir sərəncam ABŞ hökumətinə Rusiya iqtisadiyyatının istənilən sektoruna qarşı sanksiya tətbiqinə icazə verir.

“Bu sərəncam Rusiyanın beynəlxalq arenada sabitliyi pozan əməllərini davam etdirəcəyi təqdirdə Birləşmiş Ştatların strateji və iqtisadi əhəmiyyətli sanksiyalar qəbul edəcəyini nümayiş etdirir”, - “Amerikanın səsi” sənədə belə şərh verib.

Ağ Ev rəhbəri çıxışı zamanı jurnalistlərin “Şimal axını-2” qaz xətti barədə suallarına da cavab verib. Hazırda bir çox amerikalı senatorlar bu layihə ilə əlaqəsi olan şirkətlərə qarşı sanksiyalara nail olmağa çalışırlar. Bayden Rusiyadan Almaniyaya çəkilən boru xəttinin əleyhinə olduğunu desə də, bunun mürəkkəb məsələ olduğunu da qeyd edib. "Çünki ABŞ-ın müttəfiqlərinin mənafeyinə toxunur". 

Rusiyaya qarşı aprelin 15-də qüvvəyə minən sanksiya paketində qaz xətti əleyhinə sanksiya nəzərdə tutulmayıb.