Sosial

“Bir ailə şam yeməyini 5 ulduzlu oteldə yeyirsə, fitrə pulunu da ona uyğun verməlidir”

Lalə Mənəfli
28 Aprel, 2022
127

açıq mənbədən götürülüb

Ramazan ayının son günlərini yaşayırıq, bayrama sayılı günlər qalıb. Bu bayramda hər bir ailə evdəkilərin sayına uyğun olaraq fitrə zəkatı çıxarmalıdır.

Bəs görəsən fitrə kimə və nə qədər verilməlidir?

Bununla bağlı şəhərdə kiçik bir sorğu keçirdik. İradə Mirzəyevanın fikrincə, fitrə imkansız ailələrə, hətta maddi durumu çətin olan tələbələrə belə verilə bilər. Onun sözlərinə görə, fitrənin məbləği isə onu verən ailənin maddi imkanına bağlıdır.

Murad adlı gənc deyir ki, fitrə çıxararkən adambaşına üç kilo düyünün qiyməti götürülməlidir.

Kəmalə Bayramova fitrəni xəstə və tək yaşayan xalasına verdiyini söyləyir.

“Ümumilikdə isə kasıb ailələrə, yoldaşı olmayan körpə uşaqlı analara verilməlidir”, - deyə o əlavə edir.

Asudə Babayeva da fitrə pulunun başqasına yardım etməyə gücü çatmayanlara verilməli olduğunu deyir.

Qafqaz Müsəlmanları İdarəsi fitrə zəkatının adambaşına 10-15 manat olmasını tövsiyə edir.

"Fitrəni hər kəsmi verməlidir yoxsa ancaq oruc tutanlar?"

“Bunu kim müəyyənləşdirib, nəyə əsaslanaraq qəbul edilib, bəlli deyil”.

İlahiyyatçı Elşad Miri QMİ-nin fitrə zəkatının 10-15 manat müəyyənləşdirməsinə münasibət bildirərkən belə deyir.

“Əvvəllər fitrə buğdanın, arpanın çəkisi ilə müəyyənləşirdi. Amma indi bu düzgün yanaşma deyil. Aparıb onu kiməsə versək bununla bayram keçirə biləcəkmi? Məsələyə bir az geniş baxılmalıdır. Hətta deyirlər ki, gün ərzində yeyilən iki yeməyin pulunu vermək lazımdır. Niyə? Sən iki dəfəmi yemək yeyirsən gün ərzində? Üç dəfə yediyini nəzərə alsan nə dəyişəcək?”

Elşad Miri deyir ki, fitrə zəkatı bir ailənin ortalama qidalanmasına uyğun hesablanmalıdır.

“Bir ailə şam yeməyini 5 ulduzlu oteldə yeyirsə, deməli, fitrə pulunu da ona uyğun verməlidir. Başqası isə imkanı nəyə çatırsa ona uyğun çıxaracaq. Bu məsələdə insan vicdanı ilə fikirləşməlidir ki, mənim verdiyim pulla həmin insan bayramı keçirə biləcəkmi?”

İlahiyyatçı bəzi məqamlara da aydınlıq gətirir.

“Bəzən də soruşurlar ki, fitrə pulu uşağa, maşına yoxsa evə görə verilməlidir? Belə bir anlayış yoxdur… Ya da soruşanlar tapılır: “Hamilə qadının bətnindəki uşağa da fitrə çıxarılmalıdır?” Yox, əslində, belə bir fikir yoxdur. Amma imkanın varsa daha çox fitrə çıxara bilərsən. Bəzən də “Bəqərə” surəsini əsas gətirərək fitrəni yalnız oruc tutanlara vermək lazım olduğunu söyləyirlər. Amma bu bir yardımlaşmadır. İslamda sözügedən bayram ənənəsi faktiki olaraq, insanların birgə olmasını, paylaşmasını, bölüşməsini istəyir.”.

Fitrə pulu Ramazan ayının sonuncu günündə çıxarılmalıdır.

 

Sosial

Bakı gələn mövsüm “Formula 1” sprint yarışı keçirmək niyyətindədir

Roza Məmmədova
19 May 2022

açıq mənbədən götürülüb

Növbəti mövsüm təklif olunan altı sprint yarışından biri Bakıda keçirilə bilər. “Reuters”in məlumatına görə, bu barədə mayın 16-da "Formula 1" üzrə Azərbaycan Qran Prisinin promouteri Arif Rəhimov jurnalistlərə müsahibə verib. "Mən sprint yarışlarını çox sevirəm, bu yarışlar oyunlara daha çox həyəcan qatır”, - deyən promouter iyunun 12-də keçiriləcək “Formula 1” ilə bağlı müzakirənin gündəmində bu məsələnin də olduğunu bildirib. “Gələn il sprint yarışını Bakıda keçirməkdən şad olaram. Ümid edirəm ki, 6 yarışdan biri Bakıda keçiriləcək. Mən bu ideyanın qızğın tərəfdarıyam. Yeniliklərin müsbət təsir edəcəyini düşünürəm. Əks təqdirdə oyunlar darıxdırıcı olur, insanlar eyni formata çox öyrəşir və sonra maraqlarını itirirlər”, - deyə o...
Sosial

Azərbaycanda yoluxma artdı

19 May 2022

açıq mənbədən götürülüb

Azərbaycanda koronavirus (COVID-19) infeksiyasına 10 yeni yoluxma faktı qeydə alınıb, 3 nəfər müalicə olunaraq sağalıb. Nazirlər Kabineti yanında Operativ Qərargahın mayın 19-a olan məlumatına görə, COVID-19 üçün götürülən analiz nümunələri müsbət çıxmış şəxslər arasında ölən olmayıb. Azərbaycanda indiyədək ümumilikdə 792 695 nəfərin koronavirus infeksiyasına yoluxması faktı müəyyən edilib. Onlardan 782 936 nəfər müalicə olunaraq sağalıb, 9 710 nəfər vəfat edib, aktiv xəstə sayı 49 nəfərdir. Ölkədə son sutka ərzində 2 964, hazırkı dövrədək isə 6 865 181 test aparılıb.

Seçilmiş Videolar

Toplum TV loqo