ToplumTV
Uzun zamandır qapısı bağlı qalan Əbubəkr məscidində bərpa-gücləndirmə işləri aparılacaq. Bununla bağlı Bakı şəhər İcra Hakimiyyətinə məxsus "Bakı Şəhər Əsaslı Tikinti və Təmir" MMC tender də elan edib.
Məscidin fəaliyyəti 2008-ci il avqustun 17-də ora iki əl qumbarası atıldıqdan və hadisə zamanı 2 nəfər öldükdən, 18 nəfərsə ağır bədən xəsarəti aldıqdan sonra dayandırılmışdı.
Hadisə zamanı məscidə ziyan dəydiyi, minarələrin qəzalı vəziyyətə düşdüyü bildirilirdi.
“Əbubəkr” məscidi fəaliyyəti dövründə ibadət edənlərin sayının çoxluğuna görə seçilib, xüsusən də cümə günləri ibadət edənlər yetərincə çox olduğundan bəzən onlar küçədə namaz qılırdılar və bu zaman yolda tıxac yaranırdı.
Doğrudur, onun yaxınlığında yaşayan sakinlər danışır ki, məscidin fəaliyyəti dayandırılsa da, burada 2019-cu ilin fevralına qədər ibadətə qismən icazə verilib.
“Ondan sonra isə buna da imkan vermədilər. Ətrafda yaşayanlara, iş yerləri yaxın olanlara namaz qılmağa icazə verilirdi. Amma bura hamının üzünə açıq olmalıdır. İndi elə bir dövrdə yaşayırıq ki, xüsusilə gənclərin mənəvi saflaşmağa ehtiyacı var” – adının çəkilməsini istəməyən sakin söyləyir.
“Toplum TV” əməkdaşı Əbubəkr məscidində söküntü işlərinə başlanmasına şahid olub və sakinlərin dediyinə görə, təxminən 2 aydır proses davam edir. Onlar söküntü işləri başlamazdan öncə Bakı şəhər İcra Hakimiyyətinin başçısı Eldar Əzizovun məscidə baxmağa gəldiyini də deyirlər.
Məscidin keçmiş imamı Qamət Süleymanova yaxınlığı ilə seçilən İlqar (ad şərtidir) deyir ki, Əbubəkr məscidi bələdiyyənin balansına keçəndən sonra onların əhatə dairəsindən çıxıb: “Ondan sonra bizdə dəqiq məlumatlar yoxdur. Orda sökən kimdir, təmir edən hansı qurumdur, məsuliyyət daşıyanlar bizə bəlli deyil. Sadəcə, bizə o vaxt demişdilər ki, dövlətdən vəsait ayrıldıqdan sonra təmir işləri başlana bilər”.
O bildirir ki, məscid seysmik ərazidə yerləşdiyindən 10 metr dərinlikdə analizlər götürülüb və laboratoriyaya göndərilib: “Görünür, məscidi əsaslı restavrasiya etmək qərarına gəliblər”.
Hələ ötən ilin əvvəlində Dini Qurumlarla İş üzrə Dövlət Komitəsinin (DQİDK) sədr müavini Səyavuş Heydərov bildirib ki, məscidin minarəsinin təməlində problem aşkarlanıb: “Minarənin əyilməsi qəza vəziyyəti yaradırdı. Buna görə də orada toplaşmaq təhlükəlidir. Minarənin bərpa edilməsi və ya sökülüb yenidən tikilməsi üzərində iş gedir. Bundan sonra isə məsciddə icma yaradılacaq və fəaliyyətə başlayacaq”.
Məscidin imamı olmuş Qamət Süleymanov “Toplum Tv”-yə təmirin nəinki onu, ora ibadətə gələn vətəndaşların hamısını sevindirdiyindən danışıb: “Təmirin bitməsini gözləyirik. Bərpa əsaslı gedir, ona görə də bir ildən az, ya çox çəkəcək. Dövlət özü bu təmiri edir, yüksək səviyyədə olacaq və dəyişikliklər gözlənilir. Gözləyirik ki, yenidən istifadəyə verilsin və yenidən orada ibadət edilsin”.
Q.Süleymanovun sözlərinə görə, təmir işlərindən sonra kimin imam olması ilə bağlı heç bir məlumatı yoxdur.
“Məscidin icması var. Sadəcə, son zamanlar qanunlarda dəyişikliklər edilib. Əvvəllər icmanın tərkibi üçün 10-11 nəfər lazım idisə, indi bu sayı 50 nəfərə qədər artırıblar. Terror hadisələri baş verdiyi üçün biz bu prosesi çatdıra bilmədik. Ola bilsin ki, icmayla bağlı hansısa düzəlişlər ediləcək. Yenidən icmanın sədri kimi qalacağımı bilmirəm. Görək, hər halda o məscid bizim məsciddir. Necə məsləhətdi, elə də olsun”, - o bildirir.
İlqar isə məscidlə bağlı qərarı Dini Qurumlarla İş üzrə Dövlət Komitəsinin verəcəyini ehtimal edir: “Kimin imam olmasına, məscidin hansı təriqətə “hədiyyə” edilməsinə onlar qərar verəcəklər. Mən gedişatdan belə görürəm ki, bu vəhdət məscidi olacaq. Heç şübhəsiz ki, dövlət bunda maraqlıdır. Hər necə olur-olsun, bizim üçün fərqi yoxdur. Əsas məscidin fəaliyyətidir. Kimisə məsciddə hansı təriqətdən olduğuna görə təhqir etmirik, təkcə “Allah hidayət etsin” deyə bilərik”.
“ToplumTV” Dini Qurumlarla İş üzrə Dövlət Komitəsindən məscidin aqibəti ilə bağlı suallara cavab ala bilməyib.
Qafqaz Müsəlmanları İdarəsinin sədr müavini Fuad Nurullayevsə “siyasi suallar”a cavab vermədiyini deyib və qurumun mətbuat katibinə müraciət etməyi tövsiyə edib. İdarənin mətbuat katibi Rəhimə Dadaşova ölkə xaricində olduğunu bildirib və sualları cavabsız qoyub.
Bakının Nərimanov rayonunda yerləşən Əbubəkr məscidinin 1998-ci ildə Küveyt Xeyriyyə cəmiyyətinin dəstəyi ilə inşa edildiyi bildirilir və ölkədə sünnə təriqətinin ən böyük məscidi kimi təqdim olunur.
Əbubəkr fəaliyyət göstərdiyi dövrdə həmişə medianın diqqətində olub, məscid icması radikal və vəhabi kimi təqdim edilsə də, icma tərəfindən bu iddialar rədd edilib.
Məscid icmasının üzvü İlqar ida eyni fikirdədir: “Onu deyənlər ünvanı səhv salmışdılar”.
Milli Məclisin İctimai birliklər və dini qurumlar komitəsinin üzvü Azər Badamov “Toplum TV”-yə Azərbaycanda dini etiqad azadlığının konstitusiya ilə təmin oldunduğunu deyir.
“Amma burada bir məsələ var ki, radikal mövqeli dini cərəyanların fəaliyyətinə icazə verilmir. Qanunla da bu qadağandır. Əgər vaxti ilə bu addım atılmışdısa, deməli radikal dini cərəyanların görüntüləri aşkar edilib. Amma müvafiq orqanlar məscidin fəaliyyətini məqsədəuyğun hesab edirlərsə, yəqin fəaliyyətlərinə yenidən başlayarlar”.
Deputat dini radikalizmin qarşısının alınmalı olduğunu, bunun cəmiyyət üçün böyük bir təhlükə sayıldığını söyləyir və əlavə edir ki, radikalizmdən uzaq dini etiqadların inkişafı sərbəstdir.
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.
Youtube: https://www.youtube.com/channel/UCztIohlYx63yMJzcRTF18IA
WebSite: https://toplum.tv
Facebook: https://www.facebook.com/toplumtv
İnstagram: https://www.instagram.com/toplumtv/
Telegram: https://t.me/Tvtoplum
Şikayətlərinizi Whatsapp-da Qaynar Xəttimizə göndərin: +99450 247 55 06
Azad edilmiş ərazilərdə evlərini özləri inşa etmək istəyənlərin müraciətlərinə baxıla bilər
Açıq mənbələrdən götürülüb
Açıq mənbələrdən götürülüb
Neft gəlirləri ədalətli bölünürmü? - SORĞU
Makron Avropadakı müttəfiqləri qorxaq olmamağa çağırıb
"Arxa cəbhədə olmuşuq deyə veteranlıq vermirlər"
İranla münasibətlər bərpa olunur, azərbaycanlı diplomatlar qayıdacaq
Neft gəlirləri doğrudanmı ədalətli bölüşdürülüb? - Natiq Cəfərliylə müzakirə