Sosial

Əli Kərimlinin mühafizəçisi işgəncələrə məruz qaldığını deyir

11 Mart, 2021
1640

Sosial Media

AXCP fəalı bildirib ki, onu zorlamaqla, sonra da videoya çəkib yaymaqla hədələyiblər

Azərbaycan Xalq Cəbhəsi Partiyasının (AXCP) həbsdə olan fəalı Niyaməddin Əhmədov Bakı Ağır Cinayətlər Məhkəməsindəki ifadəsində belə deyib. O partiya sədri Əli Kərimlinin ictimai əsaslarla mühafizəçisi olduğunu deyib. Bildirib ki, Əli Kərimlinin əleyhinə ifadə verməsi üçün ağlasığmaz işgəncələrə məruz qalıb.

Martın 10-da hakim Siyavuş Hacıyevin sədrliyilə keçirilən məhkəmə prosesində əvvəlcə prokuror ittiham aktını elan edib. İttihamda yazılıb ki, Almaniyada siyasi sığınacaq almış, sosial şəbəkələrdə Azərbaycan hökumətini, o cümlədən hakim ailəni sərt ifadələrlə hədəfə alan Qabil Məmmədov terror məqsədilə açıq çağırışlar üçün Niyaməddin Əhmədova pul göndərib. Həmçinin AXCP fəalının evindən dövriyyədə olması qadağan edilən, üzərində kamera olan eynək tapıldığı iddia olunur. Ona qarşı Cinayət Məcəlləsinin 214-1 (terrorçuluğu maliyyələşdirmə), 233-1.2.1 (bir qrup şəxs tərəfindən qanunla mülki dövriyyədə olmasına yol verilməyən əşyaları əldə etmə, saxlama) və 28.281 (dövlət əleyhinə yönələn açıq çağırışlara hazırlıq) maddələrilə ittiham irəli sürülüb.

Niyaməddin Əhmədov özünü təqsirli bilmədiyini, yazılanların əsassız və yalan olduğunu söyləyib. O bildirib ki, 2020-ci il aprelin 15-də əvvəlcə onu karantin rejimi qaydalarını pozma və polisin qanuni tələbinə tabe olmama ittihamıyla 1 aylıq inzibati qaydada həbs ediblər. Onun sözlərinə görə, həmin vaxt o, SMS-icazə ilə çıxmışdı və heç bir qayda pozuntusundan, polisə müqavimətdən söhbət gedə bilməzdi. Yaşadığı evin yaxınlığında zibil atarkən mülki geyimli şəxslər onu saxlayaraq, zor tətbiq ediblər. Həm saxlandığı zaman, həm də sonradan aparıldığı Xətai rayonu, 34-cü polis bölməsində zorakılığa məruz qalıb. Daha sonra məhkəmə qarşısına çıxarılaraq, barəsində 1 aylıq inzibati həbs qərarı verilib. Binəqədidə yerləşən, inzibati qaydada həbs olunanların saxlandığı təcridxanada bu cəzanı çəkərkən onu başına keçirərək, Dövlət Təhlükəsizliyi Xidmətinə (DTX) aparıblar. Orada Əli Kərimlinin əleyhinə ifadə verməsi üçün işgəncələrə məruz qaldığını deyən Niyaməddin Əhmədov bu barədə ətraflı danışıb:

“Dedim ki, Əli Kərimlidən nə bir manat almışam, nə də vermişəm. Sadəcə, ictimai əsaslarla, ehtiyac olanda onun yanında olmuşam, gedib-gəlmişəm. Başladılar yenə vurmağa. Məni bir rezin kameraya aparıb yerə uzatdılar, ayaqlarımı dizdən yuxarı qatladılar, altına dubinka ilə vururdular. Döyə-döyə elə olurdu ki, vəziyyətimin pisləşdiyini hiss edirdilər. Onda dayanırdılar, sonra davam edirdilər. Mən işgəncədən keçən adam kimi, dediklərimin məsuliyyətini dərk edirəm. Yaxşı bilirəm ki, yalan danışsam, bunları mənə təkrar tətbiq edərlər. Ona görə də nə varsa, necə olubsa, onu danışıram. Hər dəfə 30-40 dəfə ayağımın altına vururdular, fasilə verib, sonra yenə davam edirdilər”.

Niyaməddin Əhmədovun sözlərinə görə, onun tələb olunan ifadəni vermədiyini görəndə cinsiyyət orqanına da zərbə endirilib: “Məni arxası üstə yerə uzatdılar, kişi xeylağına ağrı verən hissədən elə basdılar ki, ağrıdan huşumu itirirdim”.

AXCP fəalı bildirib ki, onu zorlamaqla, sonra da videoya çəkib yaymaqla hədələyiblər. Yenə də razılaşmayıb: “Dedim ki, mənim üçün alçalmaq yalan danışıb, kiminsə üzünə durmaq olar. Mənim iradəm indi özümdə deyil, sizin əlinizdəyəm, nə istəsəniz eləyə bilərsiz. Amma hədələdikləri əməli eləmədilər. Bütün bu işgəncələr saat 11-dən 5-ə qədər davam elədi. Yenə də başıma torba keçirib Binəqədi təcridxanasına gətirdilər. Bir gün sonra yenə apardılar. 10 gün saxladılar. Mənimlə gah xoş davranırdılar, gah da güc tətbiq edirdilər. Amma terror ittihamı barədə heç nə demirdilər. Ancaq Əli Kərimli haqda ifadə tələb edirdilər”.

Niyaməddin Əhmədovun sözlərinə görə, 10 gün sonra onu yenidən DTX-dan Binəqədiyə - təcridxanaya qaytarıblar. Mayın 15-də inzibati həbsdən buraxılmalı olduğu gün saat 16 radələrində iki nəfər gəlib onu təcridxanadan Baş Prokurorluğun Ağır Cinayətlərə Dair İşlər üzrə İstintaq İdarəsinə aparıb: “Orada Orxan Babayev dedi ki, konspekt verəcəyik, orada yazılanları kameraya danışarsan, buraxılacaqsan. Əlavə elədi ki, görürsən, indiyə qədər səndən alınan ifadələr də şahid ifadələri olub. Dedim ki, siz deyənləri eləməyəcəm. Öz əxlaqlarına uyğun ifadələr danışdılar. Sonra başqa bir otağa – işimi aparan müstəntiq Ramin Babayevin otağına gətirib, mənə ittiham vermək istədikləri maddənin sanksiyasını göstərdilər ki, 10 ildən 14 ilə qədər həbsdə olacaqsan. Dedim ki, mən ləyaqətsizlikdənsə, ləyaqətlə həbsdə qalmağı seçirəm”.

AXCP üzvü bildirib ki, həmin gün onu təqsirləndirilən şəxs qismində cəlb edəndən sonra gecə saat 12 radələrində yenə DTX-ya aparıblar. Amma bu dəfə orada ona zor tətbiq olunmayıb. Öncə iki nəfər mülki geyimli şəxs onunla normal şəkildə danışaraq, səhv etdiyini başa salmağa çalışıb, Milli Şuranın dağılmaq üzrə olduğunu söyləyiblər, Eldəniz Quliyev və Rafiq Manaflının istefa xəbərini çatdırıblar. Deyiblər ki, əgər prokurorluqda təklif olunan variantı seçsə, daha yüksək səviyyədə yaşayışı olacaq, müəyyən adamlarla görüşəcək.

Bu söhbətdən sonra da razılaşmayıb və gecə saat 2 radələrində onu kameraya aparıblar. Ertəsi gün isə Nəsimi Rayon Məhkəməsinə aparılıb, barəsində ilkin istintaq dövrü üçün 4 aylıq həbs qətimkan tədbiri seçilməsi barədə qərar çıxarılıb:

“Mənə dövlət hesabına vəkil təyin edilmişdi. Hakimə dedim ki, bu vəkildən imtina edirəm. Öz vəkilimi istəyirəm. Zibeydə xanım inzibati həbsdə vəkilim olmuşdu. Hakim əhəmiyyət vermədi”.

Niyaməddin Əhmədov Kürdəxanıdakı Bakı İstintaq Təcridxanasının rəisi Elnur İsmayılov tərəfindən döyülməsindən də danışıb: “Öz otağında əllərim qandallanmış vəziyyətdə, yerə yıxıb, başıma dubinka ilə vururdu...”

Cəbhəçi fəal onu da qeyd edib ki, həbsindən beş ay əvvəldən yaşadığı mənzil və telefonu dinlənilib, hara gedib-gəldiyi izlənilib.

Cinayət işinin materiallarında Niyaməddin Əhmədovun Qabil Məmmədovun göndərdiyi pulu Elçin adlı şəxsdən götürdüyü iddia olunur. AXCP fəalı bu barədə də danışıb: “Elçinlə üzləşmədə dedim ki, əgər mən səndən pul almışamsa, mən vicdansızam, sən yalan danışırsansa, sən vicdansızsan. Müstəntiqə dedi ki, baxın, məni söyür. Dedim, mən söymürəm, əgər düzünü deyirsənsə, niyə narahat olursan? Onu mənim üzümə qoyurdular”.

Niyaməddin Əhmədov əlavə edib ki, Tovuz rayonunun Qazqulu kəndində Qabil Məmmədovla qonşu olublar, onu da, həyat yoldaşı Aytəni də tanıyır. Qabil Məmmədov 2017-ci ildə Azərbaycandan gedəndə kənddə bir neçə adama, o cümlədən ona da borclu olub. Bir neçə dəfə ona yazaraq, pulunu istəyib: “Təvəkkül adlı qonşumuza da, başqalarına da borcu vardı. Borclu olduqlarına hiss-hissə qaytarırdı. Eynəyi mənə Aytən göndərmişdi, Elçin gətirib vermişdi. Yazıblar ki, istintaqa məlum olmayan mənbədən əldə olunub, gömrüyə bəyan edilmədən qaçaq yolla gətirilib. Necə yəni məlum olmayan mənbədən? Demişəm, Elçin verib. Amma Elçini üzümə qoyurlar deyə, bu məsələni onun adına yazmırlar”.

Məhkəmə prosesi martın 19-da şahid ifadələrilə davam edəcək ("Meydan.tv").

Sosial

Kütləvi məzarlıqda tapılan geyimlərin azərbaycanlı hərbçilərə aid olduğu güman edilir

5 Oktyabr 2022

APA

Xocavəndin Edilli kəndində aşkarlanan kütləvi məzarlıqdakı meyitlər analizdən keçirilib və geyimlərə əsasən onların hərbçilər olduğunu deməyə əsas yaradır.  Yaxın günlərdə qazıntı işləri yenidən davam etdiriləcək. Bu sözləri oktyabrın 5-də Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi qrupunun böyük məsləhətçisi Namiq Əfəndiyev mətbuata açıqlamasında deyib.  https://toplum.tv/dunya/abs-azerbaycanin-17-ermeni-herbcini-tehvil-vermesini-alqislayib Onun sözlərinə görə, Dövlət Komissiyası Beynəlxalq Qızıl Xaç Komitəsi ilə birlikdə fevral ayından əsir və itkin düşmüş şəxslərin axtarışına başlayıb: “İlk olaraq işlərə Xocavəndin Edilli kəndində başlanılıb. Fevralda bu ərazidə 7 şəxsə aid insan qalıqları qazılaraq götürülüb. Sentyabrın 14-dən qazıntı işləri davam etdirilib. 5 tam, 1 qarışıq skelet və 12 şəxsə...
Sosial

DİN məktəbdə narkotikli konfetin peyda olmasına aydınlıq gətirib 

4 Oktyabr 2022

Rəsmi səhifə

Paytaxt məktəblərinin birində şagirdlərə konfet kağızına bükülmüş formada narkotik vasitələrin paylanıldığı barədə sosial şəbəkələrdə yayılan məlumatlar aydınlaşdırılıb.  Bu barədə Daxili İşlər Nazirliyinin sözçüsü Elşad Hacıyev sosial media hesabında məlumat yayıb.  Onun sözlərinə görə, qeyd edilən görüntü Xətai rayonundakı məktəblərin birində təhsil alan 12 yaşlı şagird tərəfindən çəkilib. https://toplum.tv/sosial/mektebde-doyulen-usagin-atasi-polis-ne-doyene-deyir-ne-video-cekene  "Həmin şagird valideyninin iştirakı ilə aparılan profilaktiki söhbətə cəlb olunub. O, konfetin üzərinə müxtəlif ədviyyatlar qataraq qeyd edilən fotonu çəkdiyini bildirib.  Daha sonra guya “narkotik”in məktəbin ətafında tanmadığı şəxs tərəfindən ona verildiyi barədə yalan təəssürat yaradaraq həmin məlumatı sosial şəbəkələrdə məhşurlaşmaq üçün yayıb", - Elşad Hacıyev bildirib.  DİN rəsmisi valideynlərdən sosial şəbəkələrdə...

Seçilmiş Videolar

Toplum TV loqo