Sosial

Keçmiş “Sovetski” sakinləri Milli Məclisin qarşısında etiraz aksiyası keçirib

5 Mart, 2021
102

Milli Məclis

Bu gün, martın 5-də paytaxtın keçmiş “Sovetski” küçəsinin yüzlərlə sakini Milli Məclisin binası qarşısında etiraz aksiyası keçirib. Aksiyanın keçirlməsinə 2014-cü ildə evlərindən köçürülən sakinlərin illərdir ədalətli kompensasiya ala bilməməsi səbəb olub. 

Sakinlər illərdir müxtəlif dövlət qurumlarına müraciətlər edib və aksiyalar keçirib, lakin şikayətlərinə baxılmır.

Etirazçılardan biri deyib ki, evlərinin qanunsuz söküntüsündə iştirak edən məmurlar cinayət məsuliyyətinə cəlb edilməlidir. Sakinlər Milli Məclisin sədri Sahibə Qafarovaya da bu barədə müraciət ünvanladıqlarını bildiriblər.  

“Biz Milli Məclisin sədrindən deputatlardan ibarət komissiya yaradılmasını, qanunsuzluqlarla bağlı Maliyyə Nazirliyində, Yasamal rayon İcra Hakimiyyətində araşdırma aparılmasını xahiş etmişik”, deyə sakinlərdən biri qeyd edib.

Digər sakin isə deyib ki, evlərinin sökülməsi müqabilində ödənilən 28-38 min manat kompensasiya reallığı əks etdirmir.

“Bu kompensasiya ilə ev almaq mümkün deyil”, deyə o qeyd edib.

Deputatlardan Elnur Allahverdiyev və Erkin Qədirli etirazçılarla görüşüb, sakinlərin problemləri ilə məşğul olacaqları barədə vədlər veriblər.

Polis aksiyanı dağıdıb, sakinlər avtobuslara mindirilərək Milli Məclisin binasının qarşısından uzaqlaşdırlıb.

Bundan sonra, sakinlər yenidən İqtisadiyyat Nazirliyinin qarşısında etiraz edib. Nazirliyin əməkdaşları 3 nəfər erirazçını qəbul ediblər.

Bakının “Sovetski” deyilən ərazisinin sökülməsinə 2014-cü ildən başlanılıb. 26 hektardan çox sahəni əhatə edən ərazidə 4 min 500-ə yaxın yaşayış və qeyri-yaşayış obyekti bir çox hallarda sakinlərlə əldə edilmiş razılığa əsasən sökülüb.

İkinci mərhələdə isə 1 920 evin söküldüyü bildirilir. Bu zaman söküntü işləri təqribən 13 hektar ərazini əhatə edib.

Amma hər iki mərhələdə kompensasiyanın məbləği ilə (hər kvadrat metrə 1500 manat ödənilib) razılaşmayan, söküntüyə dirəniş göstərən ailələr olub. Onlar müxtəlif dövrlərdə aksiyalar keçiriblər. Bununla bağlı bir sıra şikayətlər artıq Avropa İnsan Hüquqları Məhkəməsinə də göndərilib ("Turan").

Sosial

Son sutkada nə qədər insan peyvənd olunub?

10 Aprel 2021
Azərbaycanda son sutkada koronavirus (COVID-19) əleyhinə 41 827 vaksin vurulub. Nazirlər Kabineti yanında Operativ Qərargahdan aprelin 10-da verilən məlumata görə, bir gündə birinci mərhələ üzrə vaksinasiya olunanların sayı 32 886, ikinci mərhələ üzrə vaksinasiya olunanların sayı 8 941 nəfərdir. Ölkədə vurulan vaksinlərin ümumi sayı 1 153 549, birinci mərhələ üzrə vaksinasiya olunanların ümumi sayı 739 319, ikinci mərhələ üzrə vaksinasiya olunanların ümumi sayı isə 414 230 təşkil edir.
Sosial

Koronavirusa bugünkü yoluxma sayı açıqlandı

10 Aprel 2021

Heinrich-Böll-Stiftung

Azərbaycanda koronavirus (COVID-19) infeksiyasına 2 192 yeni yoluxma faktı qeydə alınıb, 1 554 nəfər müalicə olunaraq sağalıb. Nazirlər Kabineti yanında Operativ Qərargahdan aprelin 10-da verilən məlumata görə, COVID-19 üçün götürülən analiz nümunələri müsbət çıxmış 33 nəfər vəfat edib. Azərbaycanda indiyədək ümumilikdə 283 579 nəfər koronavirus infeksiyasına yoluxub, onlardan 249 013 nəfər müalicə olunaraq sağalıb, 3 879 nəfər vəfat edib, aktiv xəstə sayı 30 687 nəfərdir. Ölkədə son sutka ərzində 14 912, hazırkı dövrədək isə 3 005 197 test aparılıb.
Seçilmiş Videolar