“Bir müddət əvvəl oğlumun səhhəti kəskin pisləşdi, rayon xəstəxanasında leykoz diaqnozu qoydular, Bakıya apar dedilər. Yanvarın 7-dən xəstəxanaya yerləşdirilib.  Həkimlərin dediyinə görə, kimyaterapiya müalicəsi başlayacaq”.

Şamaxıda yaşayan riyaziyyat müəllimi Fərrux Kərimov belə deyir. 

Oğlu Seyfəddinin müalicənə gündə ən azı 100 manat xərc çıxdığını bildirən F.Kərimov qızının da xəstə olduğunu, onun müalicə xərclərini qarşılamaq üçün 15 min manat kredit götürdüyünü söyləyir: “O pul çatmadı, təkrar kredit götürdüm, amma o da yetmədi. Yardım üçün yazanlar, zəng edənlər olur, amma hələ heç kimdən kömək gəlməyib. Xaricə aparmaq lazımdır, bunun üçünsə azı 100 min dollar lazımdır. Mən riyaziyyat müəllimiyəm, o pulu ancaq kağızda yaza bilərəm”. 

F.Kərimov xəstə övladlarının müalicəsiylə bağlı Sosial Müdafiə Fonduna müraciət etsə də, cavab ala bilməyib. 

Yardım istədiyi digər qurumlardan – Şamaxı rayon İcra Hakimiyyəti, Səhiyyə Nazirliyi, Əmək və Əhalinin Sosial Müdafiəsi Nazirliyi, Heydər Əliyev Fondu və Prezident Administrasiyasından da cavab gəlməyib. 

“Leykemiya ilə mübarizə” İctimai Birliyindənsə F.Kərimova cavab veriblər ki, yalnız müəyyən dərmanların alınmasında və yardımla bağlı sosial şəbəkədə paylaşım etməkdə köməklik edə bilərlər. 

Əmək və Əhalinin Sosial Müdafiə Nazirliyinin hüquq şöbəsinin müdiri Gülnar İsgəndərova “Toplum TV”-yə açıqlamasında uşaqlar haqqında məlumatların gizli saxlandığını deyib: “Belə məsələlərdə əsas məsuliyyət Səhiyyə Nazirliyinin üzərinə düşür. Xəstəxana bizə lazımi sənədləri təqdim edərsə, araşdırılandan sonra yardım haqqında qərar verilə bilər”. 

Səhiyyə Nazirliyinin mətbuat xidmətinin əməkdaşı Elvin Hacıyev "Toplum TV"-yə bildirib ki, 2020-ci il yanvarın 1-dən etibarən müalicə prosedurları ilə TƏBİB (Tibbi Ərazi Bölmələrini İdarəetmə Birliyi) məşğul olur.

TƏBİB-in mətbuat katibi Elnarə Baxış şikayətlə bağlı məlumatların elektron poçt ünvanına göndərilməsini istəyib. Artıq bir neçə gün keçsə də, qurum hələ də sorğumuza cavab verməyib.