Toplum TV-nin qaynar xəttinə Şirvan şəhərində yaşayan 2-ci Qarabağ müharibəsi iştirakçısı, ehtiyyatda olan hərbçi Osmanov Şahin Azay oğlu tərəfindən şikayət daxil olub.

Ş. Osmanov ona qazilik statusunun verilməməsindən şikayətlənir. Şikayətçinin sözlərinə görə, eyni diaqnozla əsgər yoldaşlarından biri əlillik dərəcəsi ala bilib. Ancaq onun diaqnozunda əlillik əlamətinin müəyyən olunmadığı bildirilib.

Müdafiə Nazirliyinin Baş Klinik Hospitalının Mərkəzi Hərbi Həkim Komissiyası tərəfindən keçirilmiş müayinə zamanı Şahin Osmanova yivli tüfəngdən, qırma tüfəngdən və iri çaplı odlu silahdan atəş, partlayış travması, qapalı kəllə-beyin travması, baş beyin silkələnməsi, posttravmativ stress pozğunluğu, milli sinirin zədələnməsi, dirsək sinirinin zədələnməsi, sol yuxarı ətrafın monoparezi, sağ budun, baldırın, sol baldırın qəlpə yaraları, iki tərəfli koxlear nevrit, iki tərəfli neyrosensor ağıreşitmə diaqnozu qoyulub. Ş. Osmanova həm dinc, həm də müharibə dövründə hərbi xidmətə yararsız olduğu bildirilib. Osmanov müharibə zamanı aldığı xəsarətlərə görə hərb işindən uzaqlaşdırıldığını deyir: “Mənə deyirlər ki, səndə əlillik əlamətləri yoxdur. Əgər yoxdursa, o zaman məni hərbdəki işimə qaytarın. Evə gəlir gətirən yeganə şəxs mən idim. Anam xəstədir,onun və özümün dərmanlarını almağa pul tapa bilmirəm. İntihar həddinə çatmışam. Dövlətin verdiyi 80 manatla yaşamaq mümkün deyil. Biz bu vətən üçün canımızı qoyduq, sağlamlığımızı itirdik. Mənə deyirlər, səndə əlillik əlaməti yoxdur. Necə yoxdur ki, mən bu gün dərmanlarla, sistemlərlə yaşayıram, çəliklə gəzirəm”.

Qeyd edək ki, Şahin Osmanov Prezident İlham Əliyev tərəfindən Xocavənd, Füzuli, Cəbrayıl, Şuşa uğrunda  gedən döyüşlərə görə və Cəsur döyüşçü medalları ilə təltif edilib. 

Məsələ ilə bağlı Tibbi-Sosial Ekspertiza və Reabilitasiya Agentliyinin mətbuat xidmətinin rəhbəri Tural Qurbanov “Toplum TV”-yə bildirdi ki, şikayəçi ilə bağlı Əlillik Altsisteminə göndəriş daxil edilib:

“Osmanov Şahin Azay oğlunun əlilliyinin qiymətləndirilməsi məqsədiylə qeydiyyatda olduğu tibb müəssisəsi tərəfindən Əlillik Altsisteminə göndəriş daxil edilib. Göndəriş səbəbi hərbi xidmət zamanı yaralanma ilə əlaqədar olduğu üçün vətəndaş 01.03.2022-ci il tarixində Dövlət Tibbi Sosial Ekspertiza və Reabilitasiya Agentliyində əyani müayinə edilmişdir və müayinə zamanı diaqnozun əlillik təyininə əsas vermədiyi müəyyən edilmişdir.

Buna baxmayaraq, vətəndaş 10.06.2022-ci il tarixində yenidən əyani müayinədə iştirak edəcək və qanunvericiliyə uyğun olaraq, yenidən qiymətləndirmə aparılacaq”.

Müharibə iştirakçısı Şahin Osmanovun  dərmanlarının almasında maddi sıxıntı çəkməsi məsələsinə gəlincə isə YAŞAT Fondunun rəsmisi Elnur Niftəliyev Toplum TV-yə Şahin Osmanovun fondun subyekti hesab edilmədiyini dedi.

“Fond yarandığı vaxtda müharibə yeni bitdiyindən və əlillik dərəcələri hələ təyin olunmadığından Fond tərəfindən yaralanmış bütün şəxslərə təqdim etdikləri ilkin yaralanma sənədi ilə dəstək tədbirləri göstərilib.  Sözügedən sənəd əsasında Şahin Osmanov Azay oğlunun məişət şəraitinin yaxşılaşdırılması istiqaməti üzrə müraciətinə əsasən, 2021-ci ilin 17 dekabr tarixində 2 500 AZN vəsait  ayrılıb.   Fondun subyektləri konkret müəyyən edildiyindən və əlillik dərəcələri təyin edildiyindən, o, bundan sonrakı müraciətlərini qeyd olunan əsaslarla əlilliyinin təyin olunması barədə sənədi təqdim etməklə edə və Fondun dəstək istiqamətlərindən yararlana bilər. Bunun üçün “yashat.gov.az” rəsmi internet səhifəsindən müraciət edə və ya Fondun 8110 Çağrı Mərkəzilə əlaqə saxlaya bilər”, - açıqlamada qeyd olunub.    

“Toplum TV” məsələni diqqətdə saxlayacaq.

Günel Manaflı