İyunun 30-da Sumqayıt Şəhər Məhkəməsində Azərbaycan Xalq Cəbhəsi Partiyasının (AXCP) fəalı Mütəllim Orucovun məhkəməsi davam etdirilib.

Mütəllim Orucov ötən ilin oktyabrında - siyasi mühacir kimi yaşadığı Almaniyadan deportasiya olunduqdan beş ay sonra narkotik maddələrin qanunsuz dövriyyəsi ittihamı ilə həbs edilib.

Məhkəmə iclası başlayan kimi vəkil Nemət Kərimli müvəkkilinin şüşə qəfəsdən çıxarılmasını xahiş edib.

Hakim vəsatəti təmin edib, nəzarətçilər Mütəllim Orucovu şüşə qəfəsdən çıxararaq vəkilin yanında oturdublar.

Məhkəmə iclasına şahid kimi DİN Baş Mütəşəkkil Cinayətkarlıqla Mübarizə İdarəsinin iki əməliyyatçısı Rövşən Məmmədəliyev və Elman Quliyev dəvət olunmuşdu. Onlar ifadələrində göstərdilər ki, Mütəllim Orucovda narkotik olması barədə əməliyyat məlumatı alıblar.

Mütəllim Orucovsa barmağını Elman Quliyevə tərəf uzadaraq: “Maşında narkotiki mənim üstümə bu atıb”, - dedi.

Bundan əvvəlki məhkəmə iclasında təqsirləndirilən şəxs qismində ifadə verən Mütəllim Orucov demişdi ki, Baş Mütəşəkkil Cinayətkarlıqla Mübarizə İdarəsində onu soyunduraraq videogörüntülərini çəkiblər, butılkaya oturdacaqlarıyla hədələyiblər.

Narkotiki üzərinə götürməsini tələb ediblər. Əks halda həmin görüntüləri yayıb onu rüsvay edəcəkləri ilə şantaj ediblər. O da deyilənlərlə razılaşmaq məcburiyyətində qalıb.

Sonra vəkil Tural adlı şəxsin əlavə şahid kimi məhkəməyə dəvət olunması ilə bağlı vəsatət qaldırdı. Vəsatətini belə əsaslandırdı ki, həmin şəxs Mütəllim Orucovu sonuncu dəfə zəng vuraraq evdən çağırıb.

Mütəllim Orucov deyilən yerə gələndə “Bandotdel” əməliyyatçılarına tuş gəlib, onu zorla maşına oturdub aparıblar.

Vəkil hesab edir ki, polislər Mütəllim Orucovu tutmaq üçün Tural adlı şəxsdən istifadə ediblər. Hakim vəsatəti təmin etdi.

Məhkəmə iclası iyulun 21-də davam edəcək.

Mütəllim Orucova qarşı Cinayət Məcəlləsinin 234.4.3-cü (narkotik maddələrin qanunsuz dövriyyəsi) maddəsi ilə ittiham irəli sürülüb, bu maddə ilə o, 12 ilədək azadlıqdan məhrum edilə bilər.

Azərbaycan Xalq Cəbhəsi Partiyasında Orucovun siyasi motivlərlə - Almaniyada Azərbaycanda insan hüquqlarının pozulmasına qarşı etiraz aksiyalarının iştirakçılarından biri kimi həbs edildiyi qənaətindədirlər. Hüquq müdafiəçiləri onu siyasi məhbus kimi tanıyıb.