Sosial

“Siyasi prosesə qatılan 1 qadın 10 kişini cəsarətləndirə bilər” 

Aytac Məmmədli
11 Mart, 2021
1205

“Azad olan və siyasi proseslərə qatılan bir qadın 10 kişini cəsarətləndirə bilər. Azad qadın azad uşaq böyüdəcək ki, bu da cəmiyyətdə azadlığa olan tələbi formalaşdıracaq”.

"OYAN" hərəkatının İdarə Heyətinin üzvü Nahid Cəfərov “8 Marş” aksiyası zamanı baş verənləri “Toplum TV”-yə şərh edərkən belə deyir.

Martın 8-də Bakının mərkəzində feminist fəallar aksiya keçirməyə cəhd ediblər. Əraziyə cəlb olunmuş polis qüvvələri buna imkan verməyib və 25 aksiya iştirakçısını saxlayıb. Onlardan bəziləri polis şöbələrində müxtəlif fiziki və psixoloji təzyiqlərə məruz qaldıqlarını bildiriblər. 

Feministlərə qarşı ifrat zorakılıq belə bir sual yaradır: hakimiyyət siyasi iddia sərgiləməyən kəsimə niyə bu qədər aqressiv yanaşır? 

Nahid Cəfərov - Sosial Media

Nahid Cəfərov deyir ki, sıravi insanın baxış bucağına görə femimizm hərəkat olaraq hakimiyyət üçün təhlükəli görünməyə bilər, amma bu, yanlış yanaşmadır: “Cəmiyyət müəyyən qruplardan ibarətdir və bu qruplar passiv qaldıqca, hakimiyyət üçün təhlükə yaranmır. Siyasi partiyaların işi onları aktivləşdirməkdən ibarətdir. Ən böyük qruplardan biri də qadınlardır, amma kişilər tərəfindən siyasi-ictimai proseslərdən uzaqlaşdırılıblar. Feminizm bu qrupu aktivləşdirməyə çalışır. Hakimiyyətin onlara nifrəti də burdan yaranır”.

O hesab edir ki, feministlər İlham Əliyevin diqtəsi ilə hərəkət etmir deyə, hakimiyyət bu hərəkatı boğmağa, gözdən salmağa və cəmiyyətə əxlaqsız bir təşkilat kimi təqdim etməyə çalışır. 

“Əgər bu qrup aktivləşərsə, hakimiyyət seçki zamanı saxtakarlıq edən müəllimələr tapa bilməz. Azad olan və siyasi proseslərə qatılan bir qadın 10 kişini cəsarətləndirə bilər. Azad qadın azad uşaq böyüdəcək ki, bu da cəmiyyətdə azadlığa olan tələbi formalaşdıracaq. Bu isə İlham Əliyev hakimiyyətinin kabusudur” - N.Cəfərov belə deyir.  

Aksiyadan bir gün sonra onun təşkilatçılarından olan Nərmin Şahmarzadənin “Feysbuk” profili ələ keçirilib və adı dəyişdirilib. N.Çahmarzadənin iddiasına görə, profilini bərpa edə bilməməsi üçün adıçəkilən sosial medianın rəhbərliyinə onun şəxsiyyət vəsiqəsinin surəti də göndərilib.

Hüquqşünas Fariz Namazlı feministin kiber zorakılığa məruz qaldığını bildirir, deyir ki, N.Şahmarzadə Cinayət Məcəlləsinin 156-cı maddəsi (şəxsi həyatın toxunulmazlığını pozma ) üzrə prokurorluğa şikayət etməli, prokurorluq isə iş üzrə araşdırma aparmalıdır: “Əgər vətəndaş hesab etsə ki, prokurorluq lazımı addımları atmır, onun hərəkətsizliyi ilə bağlı ölkədaxili məhkəmələrə, daha sonra isə şəxsi həyat sirrinin pozulması ilə bağlı Avropa Məhkəməsinə müraciət edə bilər”. 

Fariz Namazlı - Sosial Media

Hüquqşünas həmçinin qeyd edir ki, feminist kiber zorakılıqda dövlət orqanlarının əli olduğunu düşünürsə, fikrini əsaslandırmalıdır: “Əsas gətirməlidir ki, profilin ələ keçirilməsi yalnız şəxsiyyət vəsiqəsilə ilə mümkündür, bu sənədin surəti isə ancaq dövlət qurumlarındadır”. 

“İnci” Psixoloji Reabilitasiya Mərkəzinin təsisçisi Ramidə Oktayqızının sözlərinə görə, feminizm illərdir pislənir, amma bu məsələyə birtərəfli baxmaq olmaz: “Ola bilər ki, hansısa qüvvələr qadın-kişi münasibətini daha da pisləşdirməyə çalışır. Feminizm insan dəyərlərinə söykənir. Dırnaqarası feminizm adı altında insanlar arasında psixoloji gərginlik yaratmağa yönəlik məsələyə həssaslıqla yanaşmalıyıq”. 

Ramidə Oktayqızı - Sosial Media

Psixoloq söyləyir ki, qadınların emosional çıxışları, özlərini ifadə edə bilmə bacarıqları, sərbəst qərar vermə gücünə sahib olmaları insanlığı qaranlığa sürükləmir, əksinə, cəmiyyəti aydınladır. 

“Qadın maşın sürür, kişilərlə bərabər əksər sahələrdə çalışır, kafedə, restoranda yaxınları ilə istirahət edir, iş görüşmələrinə gedir. Bunları həzm edə bilməyənlər cəmiyyətin savadsız, inkişafı ancaq kişilərin sosial münasibətlərində görən insanlardır. Bu da öz növbəsində aqressiv yanaşmaya, şiddətə gətirib çıxarır” deyə, psixoloq bildirir.

N.Şahmarzadənin ələ keçirilmiş profilində ictimai fəal Bəxtiyar Hacıyevlə bağlı da paylaşımlar edilib. 

Bəxtiyar Hacıyev - Sosia Media

B.Hacıyev “Feysbuk” hesabında buna belə münasibət bildirib: “Mənim səsim olan bir yazışmaya guya Nərmin Şahmarzadə ilə yazışdığımız, ancaq həqiqətdə heç vaxt demədiyim, yazmadığım, mənə yazılmamış, əslində bunu edənlərin ailə üzvlərinin, doğmalarının praktika və fantaziyasına əsaslanan cümlələr əlavə edilərək paylaşılıb”. 

İctimai fəalın “Toplum TV”-yə dediyinə görə, baş verənlərlə bağlı məhkəməyə müraciət edib-etməyəcəyini  vəkillərlə müzakirə edəcək. 

Nərmin Şahmarzadə - Sosial Media

Nərmin Şahmarzadə isə məhkəməyə və prokurorluğa şikayət ünvanlayacağını söyləyir.

Sosial

Türkiyədə imtahan suallarını qanunsuz satan azərbaycanlılar saxlanılıb

17 May 2022

açıq mənbədən götürülüb

Ankarada Amerika və Türkiyə universitetlərində təhsil almaq istəyən əcnəbi tələbələrə SAT imtahan (Scholastic Aptitude Test - akademik qabiliyyət imtahanı) suallarını satdığı iddia edilən 6 şəxs saxlanılıb. "TRT Haber"in məlumatına görə, saxlanılanlar arasında azərbaycanlıların da olduğu deyilir. Ankara Respublika Baş Prokurorluğu mayın 7-də keçirilən SAT imtahan suallarının Ankarada 2-3 min dollara satılmasından sonra istintaqa başlayıb. İstintaqı dərinləşdirən prokurorluq, İran və Azərbaycan vətəndaşları da daxil olmaqla 6 şübhəlinin “Telegram” mesajlaşma proqramı vasitəsilə əlaqəyə girdiyini aşkarlayıb. Cahid və M.N. adlı şəxslərin sualları “karantin” adlandırdıqları evlərdə payladıqları müəyyən edilib. Baş Prokurorluğun göstərişi ilə Maliyyə Cinayətlərinə Qarşı Mübarizə İdarəsinin əməkdaşları təyin olunmuş ünvanlarda eyni vaxtda...
Sosial

Müştəri restoranda servis haqqı ödəməlidirmi?

Roza Məmmədova
17 May 2022

Getty Images

Restorana gedəndə xərcinizi menyudakı qiymətlərə görə hesablayırsınızsa, sürprizə hazır olun. Bəzi kafe və restoranlarda yeyib içdiyinizdən əlavə servis haqqı da tutulur. Nədir servis haqqı? Bura restoranda dinlədiyiniz musiqi, servis xidməti, istifadə olunan qab-qacaq və s. aiddir. Bakıda “Özsüt” restoranında ofisiant işləyən Pünhan Cəfərov (ad şərtidir) deyir ki, müştərilər əvvəlcədən servis haqqı tutulduğunu bilmir: “Onlar bunu ya menyu jurnalından, ya da hesab qəbzindən öyrənə bilirlər. Müştərilər çox zaman servis haqqını ən sonda, hesabı istəyəndə görür, təbii, narazılıq edənlər də olur”. Pünhanın sözlərinə görə, bu restoranda əlavə xidmət haqqı ümumi hesabın 6%-i qədərdir: “Servis haqqı ofsiantlar müştəriyə qulluq edir, restoranın boşqabları istifadə...

Seçilmiş Videolar

Toplum TV loqo