Sosial

Türkiyədə imtahan suallarını qanunsuz satan azərbaycanlılar saxlanılıb

17 May, 2022
338

açıq mənbədən götürülüb

Ankarada Amerika və Türkiyə universitetlərində təhsil almaq istəyən əcnəbi tələbələrə SAT imtahan (Scholastic Aptitude Test - akademik qabiliyyət imtahanı) suallarını satdığı iddia edilən 6 şəxs saxlanılıb.

"TRT Haber"in məlumatına görə, saxlanılanlar arasında azərbaycanlıların da olduğu deyilir.

Ankara Respublika Baş Prokurorluğu mayın 7-də keçirilən SAT imtahan suallarının Ankarada 2-3 min dollara satılmasından sonra istintaqa başlayıb.

İstintaqı dərinləşdirən prokurorluq, İran və Azərbaycan vətəndaşları da daxil olmaqla 6 şübhəlinin “Telegram” mesajlaşma proqramı vasitəsilə əlaqəyə girdiyini aşkarlayıb. Cahid və M.N. adlı şəxslərin sualları “karantin” adlandırdıqları evlərdə payladıqları müəyyən edilib.

Baş Prokurorluğun göstərişi ilə Maliyyə Cinayətlərinə Qarşı Mübarizə İdarəsinin əməkdaşları təyin olunmuş ünvanlarda eyni vaxtda əməliyyat keçirib. Ünvanlarda çoxlu bukletlər və rəqəmsal materiallar aşkarlanıb. Əməliyyatlar zamanı Əfsanə G, Fərnaz H, Fuad K, Ələkbər K, Səid K və Əli A. saxlanılıb. Şübhəlilərin ünvanlarında aparılan axtarış zamanı 11 SAT imtahanına giriş sənədi, 18 SAT imtahan sual kitabçası və çoxsaylı rəqəmsal materiallar aşkar edilib.

Şübhəli Fuad K. isə ittiham tərəfinin ifadəsində sualları imtahan mərkəzindən çıxaran şəxsin M.N., satanın isə Cahid M. olduğunu etiraf edib:

"Suallar qutuda şifrə ilə gəlir. Onu gətirən şəxs şifrəni açıb yenidən içəri qoyur. Cahid də sualları əcnəbi tələbələrə satır. Cahidin məndən tələbi odur ki, sualları götürüb tələbələrə paylayım. Cahid Azərbaycandan köhnə dostumdur”.

Saxlanılanlardan Ələkbər K. sənədlər PDF faylı ilə gələndən sonra “Telegram”-a yükləndiyini və 500-1000 dollara satıldığını etiraf edib.

Cahid M-nin imtahan suallarını tədarük edib satdığını iddia edən şübhəli Səid K. isə bunu əlavə edib: "Bu imtahan eyni anda 170 ölkədə olur. Bu sualları Türkiyədə paylayan Cahiddir. Cahid bütün sualları, o cümlədən Bakıdakı bütün universitetlər üzrə sualları satır”.

Ankara prokurorluğunda şübhəli bilinən şəxslər barəsində “xüsusi mühafizə olunan əşyaların oğurlanması” və “dövlət qurumlarının zərərinə dələduzluq” cinayət maddələri ilə bağlı aparılan istintaq başadılıb.

Sosial

Əsgərin özünü öldürdüyü bildirilir

6 İyul 2022

Açıq mənbələrdən götürülüb

Azərbaycan Ordusunun hərbi qulluqçusu intihar edib    Bu barədə iyulun 6-da Baş Prokurorluğun mətbuat xidməti məlumat yayıb.  Bildirilib ki, 5 iyul saat 17 radələrində Azərbaycan Ordusunun müddətli həqiqi hərbi xidmət hərbi qulluqçusu əsgər Tağıyev Rəvan Zeynalabdin oğlunun ona təhkim edilmiş avtomat silahdan atəş açaraq özünü öldürüb. Faktla bağlı Hərbi prokurorluqda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanılıb.     Hazırda istintaq aparılır.  Rəvan Tağıyevin Yevlaxın Salahlı kənd sakini olduğu, hadisənin Laçında baş verdiyi bildirilir.   
Sosial

Koronavirusa yoluxanların sayı artır

6 İyul 2022

Açıq mənbələrdən götürülüb

Azərbaycanda koronavirus infeksiyasına 69 yeni yoluxma faktı qeydə alınıb, 36 nəfər müalicə olunaraq sağalıb. Operativ Qərargahdan iyulun 6-da verilən məlumata görə, ölən yoxdur. İndiyədək ölkədə ümumilikdə 793 506 nəfərin koronavirus infeksiyasına yoluxması faktı müəyyən edilib, onlardan 783 501 nəfər müalicə olunaraq sağalıb, hazırda 287 aktiv xəstə var. Bu günə qədər 9 718 nəfər vəfat edib. Son sutka ərzində yeni yoluxma hallarının müəyyənləşdirilməsi ilə əlaqədar 2 755, bu günə qədər isə ümumilikdə 6 977 685 test icra olunub.

Seçilmiş Videolar

Toplum TV loqo